Finanziell unterstützt durch
die Europäische Union
Europäisches Verbraucherzentrum Italien Büro Bozen
METEDE AVERDA DA NE GNÍ NIA INGIANÁ!

Chi contrac stlüc jö debota tla fiera...

Ti ultimi mëisc él rové adalerch tla Zentrala di Consumadus Europeica (ZCE) de plü domandes di consumadus che ê gnüs baiá sö tratan na fiera da azeté na proa debann por prestaziuns de tuning por so auto. Do passa döes edemes á chisc consumadus ciafé indere na domanda de paiamënt por l'abonamënt stlüt jö y impormó dailó s'ái intenü che povester âi sotescrit massa debota. La Zentrala di Consumadus Europeica (ZCE) Talia ves pita val' consëis pratics por ne gní nia trapolá. Por daidé indere i consumadus che é bele gnüs ingianá baiará la Zentrala di Consumadus Europeica Talia en colaboraziun cun i colegs todësc cun la dita de tuning de ci che é sozedü y damanará de cancelé les domandes de paiamënt..


JÍ CUN LE FLIGHER

Sce la compagnia straica le jore, mëssera eventualmënter rete ince les comisciuns dl intermediar

Ala Curt de Iustizia dl'Uniun Europeica ti él dan da püch rové la plüra de n passajier todësch che â cumpré chertes da joré sön internet, nia diretamënter dal sit dla compagnia, mo da n portal de intermediaziun. Le jore ê gnü straiché y la compagnia de fligri n’â nia retü döta la soma: al é avisa romagnü a ciaria dl passajier 77 euro che le portal web â ghiré sciöche comisciun por la venüda dla cherta. Le passejier é jü dan signoria y le vicar á damané la Curt de Iustizia dl'Uniun Europeica, che á detlaré che la comisciun mëss gní conscidrada sciöche na componënta dl prisc da rete ai passajiers tl caje de straicada dl jore, ater co sce ara é gnüda fissada zënza ti le lascé alsavëi ala compagnia de fligri. Sëgn messará le vicar controlé sce la compagnia de fligri savô che al gnô apliché chësta comisciun. Chësta sentënza dla Curt de Iustizia é zënzater positiva por nüsc consumadus, mo i se temun impó che l'aplicaziun ne sará nia tan saurida, dantadöt a livel extraiudiziar. Bonamënter éson plü al sigü sce an apostëia sön le sit dla compagnia.


JÍ CUN LE FLIGHER

Al se müda les condiziuns de Ryanair sön le trasport dl cufer a man

Dal 1° de novëmber dl 2018 pó i cliënc dla compagnia irlandeja che n'á nia paié l’imbarcaziun prioritara ma se tó para sön fligher n su pice cufer a man (40x20x25cm); ai messará dé jö – y paié - pro la portina i trolley da 10 kg che an podô denant se tó para sön fligher debann. Les condiziuns vel por chi che á aposté dal 1° de setëmber dl 2018 inant. A che che á aposté dan chësta data ne vëgnel nia apliché les condiziuns nöies.


CAJE DL MËIS
Na consumadëssa franzeja â cumpré da n sit web talian na blëita dër particolara: na ciasa dles popes vintage di agn setanta, n toch da colezionisć da passa 300 euro. La spediziun n'é baldi nia jüda a bun fin y ala consumadëssa ti él gnü damané ciamó scioldi surapró por la spediziun. La consumadëssa á azeté mo ince la secunda spediziun n'é nia jüda bun, chësc iade porvia dl scioper dla posta. Dedô n'ê la consumadëssa nia stada bona da avëi na resposta dal'impresa taliana. Al ê oramai passé set mëisc dal momënt dl paiamënt canche la consumadëssa é gnüda alsavëi dl'esistënza dla ECC-Net, la Rëi dles Zentrales di Consumadus Europeica, y é jüda dala ZCE Francia che á damané aiüt pro la ZCE Talia. Do düc chisc mëisc é la ZCE stada bona da stabilí danü le contat cun l'aziënda taliana y ince sce al é ciamó sté val' problems porvia dla spediziun á la consumadëssa finalmënter ciafé süa ciasa dles popes da coleziun.