Finanziell unterstützt durch
die Europäische Union
Europäisches Verbraucherzentrum Italien Büro Bozen

Verbrauchertelegramm Europa-Ausgabe Merz 2014

Beilage zur ladinischen Europa-Ausgabe Nr. 21 - Redaktion: Europäisches Verbraucherzentrum


VACANZES Y IADI

Apostè online

Tröc mët bele śëgn man da fà proieć por les vacanzes da d’isté. La signura Offertini orô s’assiguré le sconto che an ciafa sce an apostëia danperfora y à chirì n’oferta por les vacanzes tla rëi. Do che ara â ciafè l'oferta da som âra metü ite sü dać, â cliché inant y â stlüt jö la prozedöra conferman la prenotaziun. Mo spo â la consumadëssa ciafè n’oferta ćiamò miù marćé: spo âra indô scrit fora le formular y confermè süa domanda de apostaziun, chël ô dì che ara â fat döes prenotaziuns por le medemo tëmp y orô porchël se trà zoruch da öna na prenotaziun. La consulënta legala dla Zentrala di Consumadus Europeica (ZCE) ti à splighé che ara va ma dainré da se trà zoruch debann da n iade apostè online. An po ma se trà zoruch sce an paia na penala de retrata.
Paridlé ofertes y prisc de operadus desvalis sön le marćé é sambëgn da aconsié, mo an mëss mëte averda da fà ma öna na apostaziun.
De plü informaziuns é da ciafè sön nosc sit.


ECC-Net

L'ann 2013 dla Rëi dles Zentrales di Consumadus Europeiches

La Rëi dles Zentrales di Consumadus Europeiches (ECC-Net) é te 30 paîsc: te vignun di 28 stać mëmbri dl'UE, tla Norvegia y tl’Islanda, y ti pîta informaziuns ai consumadus sön sü dërć por ći che reverda les cumpres sura i confins fora tl'UE y antervëgn tl caje de retlamaziun. I zitadins residënć te un de chisc 30 paîsc po jì da süa ZCE y s’anuzé di sorvisc pità debann.
Dl 2013 à la Rëi dles Zentrales di Consumadus Europeiches (ECC- Net) fornì assistënza a 80.272 consumadus, cun n aumënt respet al ann denant dl 11%. Te dui terzi di caji revardâ le problem produć o sorvisc cumprà online. 32.522 iadi à i consumadus che à contatè la Rëi albü debojëgn de plü co ma na picia consulënza o informaziun sön le dërt di consumadus: al é gnü damanè n aiüt concret por ciafè na soluziun por na stritaria, cun n aumënt dl 9% respet al ann da denant. Zirca n terzo de chisc caji revardâ le setur di trasporć, cun le setur dl trasport di fligri che revardâ bëgn le 18,3% dles domandes d’aiüt; les retlamaziuns tl setur dl autoimprëst (4,5%) é inće gnüdes deplü. Sovënz él inće gnü fat tröpes retlamaziuns por i aparać eletrics, spo por les problematiches liades ala cumpra de chertes por avenimënć sportifs y conzerć, les multiproprietês y i pacheć turistics.
Sön la plata internet dla Comisciun europeica dla Rëi dles Zentrales di consumadus Europeiches po i consumadus ciafè les misciun de süa ZCE.


CAJE DL MËIS
Le medemo dé él rové adalerch da trëi paîsc dl’UE desvalis bëgn trëi retlamaziuns cuntra la medema botëga online cun sënta tla Talia. La botëga é dedicada ai consumadus che tëgn cunt dla moda y vënn guant, ćialzà y azessurs de de gran firmes. I consumadus che ê jüs dala Rëi dles Zentrales di Consumadus Europeiches â menè derevers la marćianzia cumprada: te dui caji se tiran zoruch, ajache i articui ne plajô nia o ajache la mosöra ê falada; tl terzo caje eserzitan le dërt de garanzia, ajache la marćianzia ê da defet. Ajache la marćianzia ne gnô nia retüda o baratada fora ê i trëi consumadus jüs dala ZCE de so paîsc.
Nosta consulënta ti â porchël ortié les trëi retlamaziuns ala botëga y s’â arjigné mentalmënter a na batalia lungia. La botëga deperpo ê arjignada a cooperè y por ći che reverda i caji de retrata âra retü döta la soma te püć dis. Inće por le terzo caje ân ciafè na soluziun do zirca 3 edemes. Bonamënter ê te düć trëi i caji le problem gnü dales dificoltês tecniches o por le fat che i consumadus ne ti ê nia jüs do ala prozedöra arjignada dala sozieté por la segnalaziun dles retlamaziuns. Al é de confort da odëi che datrai incuntun imprenditurs arjignà a cooperè canche an laôra por i consumadus!